【我心中最佳動畫《靈魂奇遇記》：同愛心平凡咁生活已經好幸福】
前排睇咗Pixar動畫《靈魂奇遇記》，不得不讚Pixar喺度故仔時嘅深厚功力，成功製咗出呢套只啱大人睇，睇完會好唏噓，仲會反思生命意義嘅卡通片👍🏻
電影中主角阿祖因為意外昏迷，唔想死嘅佢跌咗入出世前嘅靈魂先修班。呢度有好多靈魂接受特訓，以塑造佢哋唔同嘅喜好、夢想，搵到就會拎到地球通行證，去投胎做人。惟獨係靈魂22號遲遲都未搵到，佢話：「人生無樂趣，我完全唔想投胎去地球～」阿祖為咗逃避死亡，拎通行證返去人間，說服22號合作，搵佢人生嘅夢想。結果佢哋最後發現...所謂嘅夢想，根本唔應該係人生最重要嘅嘢...
拍咗拖拍到咁上下，可能大家就會諗結婚買樓生仔。擺酒要錢；買樓要錢；生仔要錢...為咗搵到更多錢🧐有人會問財務公司借，欠下一大筆債，搞到勁大壓力；有人會返幾份工長期唔夠瞓，身體五癆七傷；有人日日OT，忙到唔好話一個月至少想見幾次面，有日可以同佢傾到早晨晚安以外嘅嘢已經偷笑。
我明㗎！我知你好緊張、好愛另一半，想畀最好嘅生活佢，所以先會好執著想達到某個遠大嘅成就、目標、理想。以為去到某個職業，搵到某個人工就可以證明自己好叻好成功🤔不過...當你好努力想追求呢啲嘢嘅時候...唔經唔覺畀咗太大壓力自己。你愈來愈唔開心...愈來愈迷失...日日唉聲嘆氣，怨自己呢樣唔得，嗰樣唔得。
「我真係好蠢，點解我會咁水皮？」
「好憎我自己，做極都係咁...」
結果慢慢將呢種壓力轉嫁喺愛你嘅人身上。
仲有你擺咗咁多時間去搵錢，係就係搵到好多，但忽略咗家庭，冇放過時間陪另一半咁先大鑊。我聽過好多讀者講過：「我寧願佢搵少啲錢，多啲時間陪我」
我唔係話夢想唔重要，夢想當然重要，但要記住以下兩個pt.
1.人生冇話要點點點先成功，唔需要同人哋比較，因為比唔上人哋而自覺失敗。你有努力過、有上進心、有計劃未來，知道依家做緊嘅嘢係為咗咩已經足夠
2.唔需要咁執著，執著到不顧一切咁追逐夢想，忽略咗平凡日子中發生嘅小美好。記住錢係搵唔晒，搵得基本就夠，寧願花多啲時間去共最美的人分享每個夜晚啦～
人生好短暫，你唔會知自己幾時死，所以你應該更著眼於生活細節。例如同另一半食好出名嘅餐廳，因為食到好好食嘅嘢而感到滿足。例如同另一半攬埋一嚿 黐到實咁瞓喺床上，內心因為可以擁有佢而感到幸福。
抱住活在當下嘅心態度過人生，要學識感恩同珍惜依家得到嘅嘢，盡力感受每餐飯、每次出街、每個旅行。無分大小，無分輕重，保持對生命嘅熱情。咁到你生命完結嗰刻，你先唔會覺得後悔，覺得白過。
以前嘅我曾經踩咗入氹裡面，讀書讀到喊，自覺好廢，唔知生存係為咗乜。壓力大到落街叫陌生人唔好嘈、唔好講嘢，飯都唔食，對屋企人態度好差。係遇上呢個男朋友，佢傻傻更更，咩都笑一餐，咩都用好輕鬆嘅心態面對，我先知原來我唔使逼到自己咁緊。我唔係話男朋友冇壓力～佢都有好多，但佢識點去釋放出嚟。雖然～依家我仲係畀自己好大壓力，但至少我進步咗啲啲，識得搵時間去唞吓，感受活著嘅美好。
唉打打吓又諗番以前啲嘢搞到眼濕濕，阿媽係女人嘅嘢唔講咁多😃送畀你戲中一句好有意思嘅對白：
「魚仔想搵到夢中嘅大海，途中遇見咗一條老魚。老魚話：『呢度就係大海喇！』魚仔反駁：『呢度只係水 我要嘅係大海！』」
你...你係魚仔嗎？
#By懶醒女朋友
#靈魂奇遇記#soul#靈魂急轉彎
Search